فهاد الوقت من العام عدد ديال الناس تايبداو يراسلو المدارس/ الشركات للحصول على قبول جامعي أو عقد عمل..... هنا واحد الحاجة خاصك تردليها البال ونتا تاتراسل هاد الناس هاد الحاجة هي التناسق مابين المستوى ديال اللغة اللي عندك، والأسلوب باش تاتراسل معاهوم  سواء كنتي تاترجم ترجمة حرفية من شي سيت أو كتب ليك شي واحد فالمسألة تاتكون مفروشة، وهادشي تاينقص من المصداقية ديالك!

ماحد هاداك اللي تاتكتب ليه عارف إينا شهادة عندك، وماتايتسناش أكثر فاعلاش غاتبدى تتصنع عليه!؟أنا شخصيا كنت تاتفضل فالبدايات ديالي مع اللغة الألمانية أني نكتب بأسلوبي واخا نغلط على أن واحد خور يكتب ليا أو نبدى نترجم حرفيا ...

هادي هي الطريقة اللي كنت تانكتب بيها :

تانعصر راسي مزيان وتانكتب بأسلوبي. 
إيلى شكيت فشي كلمة كيفاش تاتكتب تانهز نشوفها فالمعجم.
إيلى كاين اللي يصحح ليا نعطيه يصصح، وإلا منين تانسالي تانهز النص اللي كتبت ونكوليه ف Google translate، ونشوف واش النص المترجم للفرنسية متناسق وماخرجش فيه أخطاء إملائية.
وفالأخير تاناخد النتيجة ونكوليها ف Gmail أو فينما بغيت ونسيفطها

والردود كانت والحمد لله ديما إيجابية... اللهم يسر للجميع